യുവത ചരിത്ര ദൗത്യമേറ്റെടുക്കണം: മുജീബ് റഹ് മാന്‍
മനാമ: ചരിത്രത്തിന്റെകൈവഴികളില്‍ മാറ്റത്തിന്റെ ചാലകശക്തിയായി വര്‍ത്തിച്ച
യുവത സമകാലിക ലോകത്ത് തങ്ങളുടെ ചരിത്ര ദൗത്യമേറ്റെടുക്കാന്‍ തയ്യാറാകണമെന്ന്
സോളിഡാരിറ്റി സംസ്ഥാന പ്രസിഡന്റ് പി.മുജീബ് റഹ്മാന്‍ പറഞ്ഞു. 'പ്രവാസ ഭൂമികയില്‍ നമ്മള്‍ ചെറുപ്പക്കാരുടെ കയ്യൊപ്പ്' എന്ന പ്രമേയത്തില്‍ യൂത്ത് ഇന്ത്യ സംഘടിപ്പിക്കുന്ന പ്രചരണ കാമ്പയിന്റെ ഭാഗമായി നടന്ന യൂത്ത് മീറ്റില്‍ മുഖ്യ പ്രഭാഷണം നടത്തുകയായിരുന്നു അദ്ദേഹം.
യുവതയെ അരാഷ്ട്രീയ വല്‍ക്കരിക്കുകയും ചിന്താപരമായി ഷണ്ഠീകരിക്കുകയും ചെയ്യുന്നശക്തികളെ തിരിച്ചറിയേണ്ടതുണ്ട്. സ്വാതന്ത്ര്യം നേടി പതിറ്റാണ്ടുകള്‍ കഴിഞ്ഞിട്ടും കൊടിയ ദാരിദ്ര്യത്തിലും പ്രയാസങ്ങളിലും കഴിയുന്ന ജനകോടികള്‍ക്ക് വിമോചനത്തിന്‍ പ്രതീക്ഷകള്‍ നല്‍കുന്ന പുതിയ നൈതിക രാഷ്ട്രീയം സ്വപ്നം കാണുകയും അത് പുലരാന്‍ വേണ്ടി യുവശക്തി ഉപയോഗിച്ച് കഠിനാധ്വാനം ചെയ്യുകയും വേണമെന്ന് അദ്ദേഹം പറഞ്ഞു.
പ്രതികരണത്തിന്റെ ചൂണ്ടുവിരലുകള്‍ തകര്‍ക്കുന്ന സാമ്രാജ്യത്വ തന്ത്രമാണ് മതത്തെ ആരാധനകളില്‍ മാത്രം തളച്ചിട്ട് അതിനെ ചലനരഹിതമാക്കുന്നത്. യുവതയെ നിസ്സംഗമാക്കാനും നിര്‍വീര്യമാക്കാനുമുള്ള ആസൂത്രിത ശ്രമങ്ങളെ തിരിച്ചറിയണം.
സാങ്കേതിക വിദ്യയുടെ ദുരുപയോഗം സ്യഷ് ടിക്കുന്ന ദുരന്തഫലങ്ങളെക്കുറിച്ച് ബോധവാന്മാരാകണം. സമരം, സേവനം, പഠനം എന്നീ മേഖലകളില്‍ കേരളത്തില്‍ ചുരുങ്ങിയ പ്രവര്‍ത്തന കാലയളവില്‍ തന്നെ ക്രിയാത്മകമായ ഇടപെടലുകള്‍ നടത്തുവാന്‍ ഒരു യുവജന പ്രസ്ഥാനമെന്നെ നിലയില്‍ സോളിഡാരിറ്റിക്ക് കഴിഞ്ഞിട്ടുണ്ടെന്നും അദ്ദേഹം ചൂണ്ടിക്കാട്ടി.
മുഹറഖ് അല്‍ ഇസ്വ്‌ലാഹ് ഹാളില്‍ നടന്ന പരിപാടിയില്‍ ജംഇയ്യത്തുല്‍ ഇസ്വ് ലാഹ് യുവജന വിഭാഗം പ്രസിഡന്‍ ജാസിം ബുഹയാല്‍, കെ.ഐ.ജി. പ്രസിഡന്റ് സഈദ് റമദാന്‍ നദ്‌വി എന്നിവര്‍ ആശംസാ പ്രസംഗം നടത്തി.നസീം സബാഹ് ഖുര്‍ആനില്‍ നിന്ന് അവതരിപ്പിച്ചു. യൂത്ത് ഇന്ത്യ പ്രസിഡന്റ് സിറാജ് പള്ളിക്കര അധ്യക്ഷനായിരുന്നു.
യൂത്ത് ഇന്ത്യ ജനറല്‍ സെക്രട്ടറി മൂസ.കെ.ഹസന്‍ സ്വാഗതവും മുഹറഖ് യൂണിറ്റ് പ്രസിഡന്‍ റ് വി.കെ. നൗഫല്‍ നന്ദിയും പറഞ്ഞു. ഖലീല്‍ പരിപാടി നിയന്ത്രിച്ചു. കെ.ഐ.ജി ജനറല്‍ സെക്രട്ടറി ഹബീബ് റഹ് മാന്‍ കിഴിശ്ശേരി, കാമ്പയിന്‍ ജനറല്‍ കണ്‍ വീനര്‍ എം.എം. സുബൈര്‍,പ്രോഗ്രാം കണ്‍വീനര്‍ ഇ.കെ.സലീം എന്നിവര്‍ സന്നിഹിതരായിരുന്നു.
No comments:
Post a Comment